ജയ്‌സ്വാളിന് ജഡേജയുടെ മുന്നറിയിപ്പ്; 'തിരിച്ചു വാങ്ങാന്‍ ശേഷിയില്ലെങ്കില്‍ പറയാന്‍ നില്‍ക്കരുത്'

ശ്രീലങ്കയ്ക്കെതിരായ ടെസ്റ്റ് മത്സരത്തിനിടെ ലങ്കന്‍ പേസര്‍ അസിത ഫെര്‍ണാണ്ടോയുമായി വാക്കേറ്റത്തിലേര്‍പ്പെട്ട ഇന്ത്യന്‍ യുവ ഓപ്പണര്‍ യശസ്വി ജയ്സ്വാളിന് കര്‍ശന മുന്നറിയിപ്പുമായി മുന്‍ ഇന്ത്യന്‍ താരം അജയ് ജഡേജ. മൈതാനത്ത് എതിരാളികളെ പ്രകോപിപ്പിക്കുകയോ സ്ലെഡ്ജ് ചെയ്യുകയോ ചെയ്യുമ്പോള്‍, തിരികെ ലഭിക്കുന്ന പ്രതികരണങ്ങള്‍ താങ്ങാനുള്ള ശേഷി കളിക്കാര്‍ക്ക് ഉണ്ടാകണമെന്നും, അതിന് കഴിയില്ലെങ്കില്‍ ഇത്തരം കാര്യങ്ങള്‍ക്ക് തുടക്കമിടരുതെന്നും ജഡേജ തുറന്നടിച്ചു.

ഇന്ത്യയുടെ ബാറ്റിങ്ങിനിടെ അസിത ഫെര്‍ണാണ്ടോ എറിഞ്ഞ ഒരു പന്തിന് ശേഷമാണ് സംഭവങ്ങളുടെ തുടക്കം. പന്തെറിഞ്ഞു കഴിഞ്ഞ ഉടന്‍ ഫെര്‍ണാണ്ടോ ജയ്സ്വാളിന് നേരെ നടന്നു വരികയും പ്രകോപനപരമായ രീതിയില്‍ ചില വാക്കുകള്‍ പറയുകയും ചെയ്തു. ഇതില്‍ രോഷാകുലനായ ജയ്സ്വാള്‍ അസിതയുടെ തൊട്ടടുത്തേക്ക് ചെന്ന് വീറോടെ മറുപടി നല്‍കുകയായിരുന്നു. ഇരു താരങ്ങളും തമ്മിലുള്ള തര്‍ക്കം അതിരുവിടുമെന്ന ഘട്ടമെത്തിയതോടെ അമ്പയര്‍മാരും ക്രീസിലുണ്ടായിരുന്ന സഹതാരങ്ങളും ഇടപെട്ടാണ് ജയ്സ്വാളിനെയും ഫെര്‍ണാണ്ടോയെയും പിന്തിരിപ്പിച്ചത്.

മത്സരത്തിന് ശേഷമുള്ള തത്സമയ ചര്‍ച്ചയില്‍ സംസാരിക്കവെയാണ് അജയ് ജഡേജ ജയ്സ്വാളിന്റെ പെരുമാറ്റത്തെ വിമര്‍ശിച്ച് രംഗത്തെത്തിയത്. 'കളിക്കളത്തില്‍ നിങ്ങള്‍ ഒരാളോട് എന്തെങ്കിലും തുറന്നുപറയുകയോ പ്രകോപിപ്പിക്കുകയോ ചെയ്യുന്നുണ്ടെങ്കില്‍, അവര്‍ അതേനാണയത്തില്‍ തിരിച്ചു തരുമ്പോള്‍ അത് കേള്‍ക്കാനും അത് ഉള്‍ക്കൊള്ളാനും നിങ്ങള്‍ക്ക് സാധിക്കണം. 'തിരിച്ചു വാങ്ങാന്‍ താങ്ങില്ലെങ്കില്‍ പറയാന്‍ നില്‍ക്കരുത്' എന്നതാണ് പ്രധാന കാര്യം. അനാവശ്യമായി ബൗളറുടെ അത്രയും അടുത്തേക്ക് പോയി തര്‍ക്കിക്കേണ്ട യാതൊരു കാര്യവുമില്ലായിരുന്നു' -അജയ് ജഡേജ പറഞ്ഞു. 'ആക്രമണോത്സുകത കളിയുടെ ഭാഗമാണ്. എന്നാല്‍ ഇത്തരം അനാവശ്യ തര്‍ക്കങ്ങളില്‍ ഇടപെട്ട് സ്വന്തം ഏകാഗ്രത നഷ്ടപ്പെടുത്തുന്നത് യുവതാരങ്ങള്‍ക്ക് നല്ലതല്ല. ബൗളര്‍മാര്‍ പ്രകോപിപ്പിക്കാന്‍ നോക്കുമ്പോള്‍ ബാറ്റ് കൊണ്ട് റണ്‍സ് അടിച്ച് മറുപടി നല്‍കുകയാണ് വേണ്ടത്' -അദ്ദേഹം കൂട്ടിച്ചേര്‍ത്തു.

സംഭവത്തില്‍ ഇന്ത്യന്‍ ബാറ്റിംഗ് പരിശീലകനും സമാനമായ അഭിപ്രായമാണ് പങ്കുവെച്ചത്. ബൗളര്‍മാര്‍ പ്രകോപനം സൃഷ്ടിക്കുമ്പോള്‍ ജയ്സ്വാള്‍ അത്രയധികം അടുത്തേക്ക് പോയി തര്‍ക്കത്തില്‍ ഏര്‍പ്പെടരുതായിരുന്നുവെന്നും, അത്തരം സാഹചര്യങ്ങള്‍ കൂടുതല്‍ പക്വതയോടെ കൈകാര്യം ചെയ്യേണ്ടതുണ്ടെന്നും പരിശീലകനും വ്യക്തമാക്കി.

content highlights: "Don't Give It If You Can't Take It Back": Ravindra Jadeja's Warning to Yashasvi Jaiswal